半島月餅炒到㷫

半島月餅炒到㷫

Executive日記——半島月餅炒到㷫 靚號碼餅券賣1200

2012-08-22
香港人果然乜都炒一餐！距離中秋節仲有一個多月，早前半島酒店嘉麟樓嘅酥皮奶黃月餅券開售僅一個鐘就火速售罄，唔少粉絲大失所望！不過，有姊妹同Kelly講，近日喺拍賣網站發現有人炒賣嘉麟樓月餅券，一啲靚編號嘅月餅券開價一千二百八十八蚊，比原價二百五十八蚊貴成四倍，食水非常深！Kelly奉勸大家咪炒燶月餅。

被捧為好好味嘅半島酒店嘉麟樓奶黃月餅，供應有限，年年都吸引好多人爭住買。有姊妹同Kelly呻，一張嘉麟樓月餅券，已經喺拍賣網狂炒，由原價二百五十八蚊，抬高至四百五十八蚊；而一啲靚Number嘅月餅券，好似一六六八（諧音一路路發）及一六八八（諧音一路發發），更抬價至八百八十八至一千二百八十八蚊，貴到得驚人。

無人問津分分鐘炒燶

除咗半島酒店嘅月餅外，九龍酒店嘅迷你酥皮奶皇月餅換領卡亦都有人炒，由原價二百零八蚊嘅月餅券，最高炒到三百蚊。不過，唔知係咪開價太貴，兩邊都無人問津，仲分分鐘炒燶！半島酒店嘅公關朋友同Kelly講，呢啲券賣咗出去，酒店就無辦法阻止其他人點使用張券。

Kelly覺得，過節應該開開心心，只係普通一盒月餅，就搞到滿城風雨，仲要炒到咁貴，而且係令真心希望享用月餅嘅人大失所望，咁又何必呢！

KellyChu